2008年3月29日星期六

彩雲易聚又易散

近日喺我認知嘅虛幻世界中,發生咗一次火警事故。雖則未至於破瓦頹垣,但係我諗都焚毀咗唔少物事...

我自己咁睇,要爭拗邊個放火,就如同羅生門一樣,你有你講,佢有佢話,好似謎咁。
只有當其時喺火場嘅目擊者先知乜事,故此我依啲外人係唔會講咁多。

正如星火燎原,都係由小小之火開始。
喺大風未吹之時,有無諗過一齊撲滅火種呢?

不過咁,選擇喺火災後離開嘅,果啲係人地嘅決定,大家只有感嘆嘅份兒。
如果選擇留底,不如諗下點再起翻身,唔好抱住偏見,亂來做猜測。武斷啲講,你話我聽日升仙都得架啦!

但係,我又覺得呢,有啲嘢,大家都已經點認咗,好似共同擁有咁。
火燭後走人時,連牌匾都攞走埋,又好似...
就如捐錢去東華三院做總理,自己唔撈時,都唔會要人回水呀?!

唔好太計較囉!
將心比己:不竟,大家都曾經花過不少心力呀!

離開時,不如瀟灑啲。
孑然一身,不帶走一片雲彩!

2008年3月24日星期一

難忘吃! 吃! 吃!

因為公司遲啲會搬離中環,攪到我自己都有些許失落...

其實呢...喺中環行街,飲飲食食,果種熟識嘅感覺,令人非常舒服。
就喺走之前,講下我喺中上環嘅飲食時光。

第一間係喺大道中嘅羅富記,佢嘅絕活係蜆蚧鯪魚球同腰潤。自己唔好內臟,但蜆蚧鯪魚球就真係正。

行番去大道中100號左近,有藥材鋪春回堂,我好喜歡食佢嘅龜靈膏。三十塊一盅,自己覺得佢做得好過恭和堂。

向右轉有一堆大牌檔,冬天無咁熱可以試試!

上返威靈頓街,走到卑利街處,你會見到蓮香樓。唔介意舊式茶樓格局,可以試佢嘅蓮香三寶。另外,佢嘅蓮子食品都係一絕。
再向歌賦街出發,會見到九記同勝香園。
以前愛食九記嘅爽朒,宜家佢啲味精好重,無乜食囉。
勝香園呢,雖然不賴,但永遠都咁多人。壓迫感好強,有違我食得優閒的原則。要食嘅話,不作他選,一定係通粉。

再到荷李活道 ,常幫趁嘅有公利竹蔗水,同文園麵家。
公利竹蔗水嘅招牌貨:蔗汁同蔗水,都清香甜美,愛甜就揀蔗汁,否則選蔗水就啱。
文園麵家呢,記得食鼓油撈麵!

最後上到Soho,我最喜歡嘅食店係 Bravo Latata,係一間做(仿)法國菜嘅餐廳。
詳細情形七十以前介紹過,不贅。
環境、氣氛、食物、服務我都好滿意,覺得超值!

現在要繼續溫書,下期再會!

2008年3月14日星期五

我的一到五十

見人打...
我又打...

01.  愛月:月圓固美,一彎新月也明媚。
02.  愛酒,去到瘋狂嘅狀態。
03.  愛吃甜品 (係甜品狂魔)。
04.  喜歡散步(只限海旁),同坐天星小輪。
05.  記性算好(只限閒聊),可以叫細心,也可以叫記恨。
06.  只記到容貌、對人名卻永不上心。
07.  追求簡單的東西。
08.  結果卻跟世界一樣,變得極複雜。
09.  處女座。
10.  鐘意唔分心,做完一樣先第二樣。
11.  為人痴呆。
12.  平日呆呆滯滯,少說話,驟眼看好冷傲。
13.  熟嘅話,會變開籠雀。
14.  有時會鑽牛角尖,要求多多。
15.  但係明白世上無乜嘢係完美嘅...
16.  自我保護意識極強。
17.  熟嘅話,很易說出心底話。
18.  熟嘅話,好容易相信人。
19.  所以,成日比人呃。
20.  活在矛盾中,性格變化好大。
21.  遇到麻煩,鍾意逃避。
22.  但一決定面對,就算係牆都撞埋去。
23.  以前無乜耐性,宜家有"的"咁多。
24.  平時自信看似米甕上面張貼紙咁:常滿。 
25.  其實都係假象。
26.  時常細心聆聽(賣保險?)
27.  因此,常常做咗朋友嘅免費心理醫生。
28.  不善說謊。
29.  容易動氣...
30.  又好快收。
31.  講嘢有時有骨,近乎刻薄。
32.  非不得爾,不會求人幫忙。
33.  鍾意一啲好有美感嘅嘢。
34.  鍾意高質素,但簡簡單單嘅嘢。
35.  但成日買錯嘢,呻笨。
36.  學乜嘢都好慢熱。
37.  喜歡有個性嘅人。
38.  喜歡優雅嘅人。
39.  喜歡一個人發呆。
40.  中文打字超~~慢。
41.  喜歡書。
42.  迷戀線裝書。
43.  最愛睇嘅武俠小說,係多情劍客無情劍(即小李飛刀)。
44.  不善寫作。
45.  愛睇電影。
46.  好鍾意啲古靈精怪嘅嘢。
47.  有時會無厘頭去教堂,又或去神廟。
48.  好似周身刀,其實無張利。
49.  被人話好有個性(Unique,係unique呀)。
50.  即係怪人一個。

2008年3月9日星期日

是但噏

見到人人咁好火,我又加啲油...
大家一齊學下地球文都唔錯呀!
第一:我唔專業。
第二:有時我會四處留言,多數九唔搭八...係!我特登嘅!
第三:平日帶住面具賣笑,乜都夠啦!所以我講嘅嘢都係由心出發!

固此,我上黎寫嘢,忽東忽西,係咁嫁啦!
相信我會越來越顛...

********************** ******

見到人地講開睇戲,我又講下...
唔知點解,除咗大家都睇嘅中西猛片外,我好多時都會睇埋一啲自己聽唔明嘅戲,乜法國片呀、德國片呀等(以前電視都會播唔少,宜家無乜囉...) 。
好明顯,我係長尾理論裏頭嘅少數人士,特別深刻嘅有歐語片中有下面一堆:
  1. 法國
    • Cyrano de Bergerac (大鼻子情聖,即早前話劇風流劍俠嘅電影版)
    • Jean de Florette 與 Manon Des Sources (戀戀山城,可以話呢兩套係上下集)
    • Joyeux Noel (聖誕快樂 Merry Christmas)
    • Léon the Professional (這個殺手不太冷)
    • L'histoire d'Adèle H. (情淚種情花,呢套講雨果個女嘅故事)
    • Paris, Je T'aime (我愛巴黎!)

  2. 德國
    • Ein Lied von Liebe und Tod (布達佩斯之戀 Gloomy Sunday)
    • Good Bye Lenin! (快樂的謊言)
    • Leben der Anderen, Das (竊聽者 The Lives Of Others)

  3. 巴西
    • Central Station (中央車站)
    • Diarios de motocicleta (哲古華拉少年日記 Motorcycle Diaries)

  4. 好想睇但未睇嘅,都係意大利片...得閒嘅話,都會睇埋佢地
    • Meglio gioventù, La (燦爛人生 The best of youth)
    • Nuovo Cinema Paradiso (星光伴我心)

其實仲有好多好戲(不過呢...唔好信影評,好易出事...),大家又有乜好介紹?

2008年3月5日星期三

無晒氣

今日終於無蕩失路,去到目的地。
半個鐘真係過得快,但係仲未完。
我繼續坐多十分鍾,跟住悄悄走。
原本仲諗住好優閒,最後好鬼趕。

*****************

這個MBTI職業性格測試,又幾準喎...

2008年3月2日星期日

月下獨酌好地方

為咗響應財政司司長減稅,今晚開咗枝 Yellow Tail Reserve Shiraz 2005。
帶甜,無乜單寧,有些少橡木味,可以啦!

開朴咁耐,話咗要講月下獨酌嘅好地方,但最後都無講到...
唔~~~
因為三月尾公司將會從中環搬走,所以今晚,終於下定決心講下。

基本上我去開嘅酒吧,不外乎是 IFC 嘅 Zentro,SOHO 嘅Barco,或銅鑼灣嘅花生吧等地方。
不過,既然講得係明月下獨酌,當然係希望可以:

靜靜地躲在一旁,發呆也好,做夢也好,乜都好...
最緊要係...靜!同埋見到月光!
固此我去嘅地方,同渣老板去開嘅,係兩碼子嘅事。

以下係我嘅獨酌好去處:
  1. 藝穗會嘅露天酒吧
  2. 中環三號碼頭嘅愉景森林
呢兩個地方,共通點係:
靜靜地,同埋露天嘅。

即係話,若果天氣好嘅話,你大有機會,會見到月亮!
固此,先可以月下獨酌...

花間一壺酒.獨酌無相親
舉杯邀明月.對影成三人
月既不解飲.影徒隨我身
暫伴月將影.行樂須及春
我歌月徘徊.我舞影零亂
醒時同交歡.醉後各分散
永結無情遊.相期邈雲漢

希望有天,我地能夠喺人海中,相遇並一齊...
乾杯!

2008年3月1日星期六

小品入心

經過一天身心休假,人也變得好暢快!

早前翻書的時候,找到了一本關於讀古詩的小品。

自己覺得,看古詩,最易入手的會是詩經,與及唐詩三百首。
尤其是詩經,因為它所涉及的題材廣泛,三百零五篇詩中,總有一篇會適合你。
可是,對很多人來說,讀古詩卻也甚難入手...
不要緊!萬丈高樓從地起,我們就揀一些適合自己的書材吧!

在我而言,讀書首要條件是:讀得輕鬆!
故此,我一定不會選毛詩那一類先行...
我擔保,你會在翻開書後,不消一會就把它拋棄。

那麼,應該選什麼開始才好呢?
在此,我想身邊那本小品可會適合你。
這本書叫...原來詩經可以這樣讀,作者名叫唐文。

小品,最重要能做到雅俗共賞。作者從詩經裏挑選了三十多篇詩,並以現代人眼光,深入淺出地解釋詩意,再會以佳句。

閱畢後,我肯定你也會說:
原來...詩經...可以這樣讀!

P.S. 三點幅相...真的好火熱!