三世奇緣得啖笑之小花鹿

見人人玩得咁開心，我又來！

前生從楊州來本姓司，為： 奸丞相 (乜仲有丞相，又唔覺有邊個姓司．．）
後世去青州田家托生，為： 靚仔牙醫 (我不依！）

今生性格似花鹿

你的個性有如一頭花鹿，性格慢熱。
與陌生人交往時會有點畏縮，甚至刻意築起自我防衛的圍牆。
不過當大家混熟後，就會全情投入這份友誼，與朋友無所不談，展現內心熱情純真的一面。
你對朋友與戀人都很忠誠，尤其對愛人的依賴性很強，與性格近似的人最相襯。

＊＊＊＊＊＊＊＊＊＊＊＊＊＊＊＊＊＊＊＊

呢期時常聽 Badfinger 嘅老歌 Carry on till tomorrow．．．

好多嘢要來嘅，也避不了．．．
只望能繼續上路，活著！

=3=

近日心神飄泊不定，彌漫著淡淡的憂愁。
也不知是何故，久久亦茫然若失．．．

正是月有陰晴圓缺，莫非五月梅雨未遇．．．
一時慼慼，未能釋然？

＊＊＊＊＊

大家都好像不知　=3=　何解．．．
據維基百科所述 ，此乃 "扭計、嘟嘴" ，亦是我心中的寫照！

因為我係扭計精，以前是，現在也是．．．

幻想世界

望見你那雙凌厲而略酷的明眸，令我有點不知所措。
可能我實在太緊張了，感覺就像站在被告席上，只期望聽到．．．
"被告無罪，當庭釋放！"

不過咁，或者．．．
你都一樣咁驚呢？！

哈～哈～

＊＊＊＊＊＊＊＊＊＊＊＊＊＊＊＊＊＊＊＊

音樂會過後，我又去了公利買蔗汁。
同老板娘傾了幾句，可知貓貓有否歸來？
「
　阿仔臨拉閳時，隻貓飛咗出去。
　睇佢都係走咗去搵女，重邊度識番黎呀！
　．．．
」

我隨後走到咖哩屋玩咗陣喵，佢唔怕人，又肥嘟嘟，真係幾好玩嫁！

諗下諗下：
貓都係咁，何況係人？

又來．．．納納雜

早前睇電視節目”香港故事”時，耳邊傳來了葉麗儀的聲音．．．

見你衣著顯風度，意氣風發豪情高！
便知你大有來頭．．．
Hey Big Spender!
．．．

（這時畫面上出現了大家都好熟悉，盛裝嘅大豪客！）

．．．
貴客請你將步留，此地有美人醇酒．．．

此刻腦海裏浮現出貌如周慧敏嘅博客，所講的一番話．．．
要借用靚斯奶一句：真係殺死人！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

上個星期喺地鐵站等人嘅時候，見到個阿婆係咁鬧孫仔．．．

"．．．杏加橙．．．．"
"．．．杏加橙．．．．"

阿婆，鬧孫仔可以用好多字句．．．
畢竟你地血脈相連，無需要咁咀咒自己啊！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

依期都唔錯，幾個悄悄走了的，全部都回來．．．
你～姣～（我的超爛普通話係咁上下）
再加上阿三點又開番回應欄，真好！

其實我讀咁多本博客書，最精彩果本會係迷失中環 。
佢最出眾嘅地方，係將精選嘅回應一拼刊登（不過出咗書後砍晒上嘅嘢就．．．）。
喺朴度，最緊要係有傾有講，先有火花！
大家出書嘅話，可以諗諗！

又，靜下來好好好孤單果個，唔知幾時番埋黎呢?

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

早排比"衛道之士"指指點點，即刻走去買張"心太野"嘅戲飛，捧捧場。

今次開四面台，烈女遇上ＯＬ，唔知有無大驚喜呢？

悠閒自在

夜來無事，心．．只望悠閒自在．．．

突然想起，昨天所取物事。
霎時一念，要輕鬆輕鬆！

此刻，卻發覺我已將水盆收到深處．．．
算．．不用也罷！

．．．
取出我那小小壺子，熱水一沖！
洗過一巡，再沖！
傾到杯子中，芳香的氣味，使我精神為之一振！
清澈的水色．．．
呷上一口，滲入到味蕾裏去．．．

不錯！我在喝茶！
綠茶中，我最愛龍井。
貪其翠綠清新，尤其是獅峰明前，讓人神怡心曠。

呵～呵～
要記上心中，真的好感謝你送給我的茶葉啊！

彩雲易聚又易散

近日喺我認知嘅虛幻世界中，發生咗一次火警事故。雖則未至於破瓦頹垣，但係我諗都焚毀咗唔少物事．．．

我自己咁睇，要爭拗邊個放火，就如同羅生門一樣，你有你講，佢有佢話，好似謎咁。
只有當其時喺火場嘅目擊者先知乜事，故此我依啲外人係唔會講咁多。

正如星火燎原，都係由小小之火開始。
喺大風未吹之時，有無諗過一齊撲滅火種呢？

不過咁，選擇喺火災後離開嘅，果啲係人地嘅決定，大家只有感嘆嘅份兒。
如果選擇留底，不如諗下點再起翻身，唔好抱住偏見，亂來做猜測。武斷啲講，你話我聽日升仙都得架啦！

但係，我又覺得呢，有啲嘢，大家都已經點認咗，好似共同擁有咁。
火燭後走人時，連牌匾都攞走埋，又好似．．．
就如捐錢去東華三院做總理，自己唔撈時，都唔會要人回水呀？！

唔好太計較囉！
將心比己：不竟，大家都曾經花過不少心力呀！

離開時，不如瀟灑啲。
孑然一身，不帶走一片雲彩！

難忘吃! 吃! 吃!

因為公司遲啲會搬離中環，攪到我自己都有些許失落．．．

其實呢．．．喺中環行街，飲飲食食，果種熟識嘅感覺，令人非常舒服。
就喺走之前，講下我喺中上環嘅飲食時光。

第一間係喺大道中嘅羅富記，佢嘅絕活係蜆蚧鯪魚球同腰潤。自己唔好內臟，但蜆蚧鯪魚球就真係正。

行番去大道中100號左近，有藥材鋪春回堂，我好喜歡食佢嘅龜靈膏。三十塊一盅，自己覺得佢做得好過恭和堂。

向右轉有一堆大牌檔，冬天無咁熱可以試試！

上返威靈頓街，走到卑利街處，你會見到蓮香樓。唔介意舊式茶樓格局，可以試佢嘅蓮香三寶。另外，佢嘅蓮子食品都係一絕。
再向歌賦街出發，會見到九記同勝香園。
以前愛食九記嘅爽朒，宜家佢啲味精好重，無乜食囉。
勝香園呢，雖然不賴，但永遠都咁多人。壓迫感好強，有違我食得優閒的原則。要食嘅話，不作他選，一定係通粉。

再到荷李活道 ，常幫趁嘅有公利竹蔗水，同文園麵家。
公利竹蔗水嘅招牌貨：蔗汁同蔗水，都清香甜美，愛甜就揀蔗汁，否則選蔗水就啱。
文園麵家呢，記得食鼓油撈麵！

最後上到Soho，我最喜歡嘅食店係 Bravo Latata，係一間做(仿)法國菜嘅餐廳。
詳細情形七十以前介紹過，不贅。
環境、氣氛、食物、服務我都好滿意，覺得超值！

現在要繼續溫書，下期再會！