2008年2月29日星期五

我愛散文

原來自己最喜歡讀的,是散文。
每個星期四,手中拿著旳,會是飲食男女。
習慣地一下子翻開,讀一讀劉健威的人情味。
細膩的文筆,早已俘虜了我的心。
由 寫給 S 開始,到以珍重結束...
每一篇都溢滿了真摯的感情,我相信一個又一個故事,都有血肉,尤如幻燈片,將一幕又一幕光與影,投射在你我眼前。
好羨慕劉先生可以結識那麼多人,能和他們打開話匣兒,又有一雙這麼靈巧的手,將人家的心事如輕煙般,一縷縷炊到大家心中。

另外,我每天也會拜讀蘋果的副刊名采,因為裏面有很多很多我好喜歡的專欄。
尤其是:
  • 倪匡先生的倪租界:在腦海中浮現出他的模樣,他的聲音,哈!哈!已經很開心!
  • 左丁山的GG細語:左先生又要開咪、做公關、賭馬仔,交遊廣闊,文筆顯淺,好!
  • 高慧然小姐的隨遇而安:很多時,他往往能一針見血地,講出大家的心底話。
  • 朱德庸先生的大家都有病:看完後,我也覺得自己患上了重病。
  • 不可不提的,當然是博客行啊!

今期講夠,下次再會!

點解咁難?

看見朴友中,個個武藝超群。
國學呀、英國文學呀、法文呀、日文呀、音樂呀...
真係厲害!話時話,自己覺得,學語言都要講吓天份。

以前我學校有個學友,初頭逢二進一(即係讀兩科,肥一科)。但係佢都可以如期畢業,令好多人大跌眼鏡。

最記得果時暑假喺學校見番面,我直頭認佢唔出,減肥幾十磅後靚人到不得了。
講番轉頭,佢喺暑假時不停讀外文,法文呀、德文呀、意大利文呀...
一科6個 credits,佢仲要攞好多A呀,A-呀,就係咁,又過關囉。

我呢?剛剛相反...唔知係自己痴呆,定有語言學習障礙,硬係差啲啲。

不過咁,我相信,就如小說基督山伯爵裏阿神父所講,歐洲語系中係有一定共通點,要是能握得到,就會進步神速(即係果啲日耳曼、拉丁、同斯拉夫語族咁上下掛)。

下個月會開始試讀意大利文,希望自己醒少少。

2008年2月27日星期三

Mövenpick white lemon

我話過,我係一個甜品狂魔...

呵~呵~
今日就買咗好幾排 Mövenpick 嘅 white lemon chocolate。
Mövenpick呢,除咗啲雪糕好味之外,朱古力都做得好好!

最重要係,呢款味其實唔易喺其他牌子見到嫁,價錢又唔貴!

好好味呀~~~

2008年2月24日星期日

牛飲餐酒

今日又開咗支紅酒了。

查實呢,紅酒呀、白酒呀,對我黎講,就如 house wine。
呢啲酒,身邊朋友又唔係太好,開咗一枝又最遲要兩日清...
固此我呢,平平地飲下就好。

若果你係初初飲酒嘅話,白酒 (主要係 Chardonny) 會係較好嘅選擇,易入口囉。
至於紅酒呢,棟番啲單寧偏淡嘅會係一個好開始,例如 Merlot、Shiraz (即係Syrah)呢類紅酒。

近來飲嘅係 Lauca Reserve Cabernet Sauvignon 2004。
Medium body,單寧適中,約略$150,算唔錯嫁啦。

再平嗰啲呢 (幾十蚊貨仔),唔好買法國酒囉,除非你想試下做噴泉啦...

不過咁,其實我比較鐘意飲 sweeet wine,sauternes呀、iced wine 呀,係我嘅至愛。
因為...我係一個甜品狂魔呀!

2008年2月23日星期六

月滿西樓

夜...黑幕漸漸垂下...
沿著中環海旁漫步,微微的海風,令人略帶寒意。
偶爾想起在三號碼頭上,有一間風涼水冷的酒吧。
於是,我再次踏步,往這所酒吧裏去。
我隨便找了一張桌,坐下來,揚手叫了一杯伏特加。
遙望彼岸,不知有誰在尖沙咀回望過來呢?
緩緩地呷上一口酒,希望灼熱的感覺,能驅走寒意。

但是,我的心卻仍覺冰冷...
遠眺晚空,沒有半點繁星,卻見今夜的月亮特別圓,滿月下,冷輝照面,仿如洗滌著我的心。

腦海中泛起浮思:
此時、哪地,又有幾許人跟我一樣,異地上,共賞明月?

口中喃喃念出 ...

紅藕香殘玉簞秋.輕解羅裳.獨上蘭舟
雲中誰寄錦書來.雁字回時.月滿西樓
花自飄零水自流.一種相思.兩處閑愁
此情無計可消除.才下眉頭.卻上心頭

2008年2月20日星期三

痴呆

睇完這裡之後,硬係有啲心癢...
終於...擇日出發...
去到門口,歡天喜地,卻發覺...
...
誤將馮京作馬涼!
...
自己竟然將聖約翰堂跟聖保羅堂攪亂了....

原來我真的是
痴痴呆呆...

2008年2月18日星期一

欲購從速

現某W字頭超市正進行御鹿 X.O. 干邑 (即 Hine X.O. Congnac) 清貨大特賣,傳聞這超市日後將不會再代售此酒。為免向隅,欲購從速。

特約記者 Morca 報導完畢。

2008年2月17日星期日

音樂瑣碎事

今日喺度執嘢嘅時候,順便將一疊CDs轉為MP3,方便平日聽下啦!

計有 :

  1. Bach - The Well Tempered Clavier
  2. Beethoven - Symphonies 1 to 9
  3. Igor Stravinsky - The Rite of Spring
  4. Vivaldi - The Four Seasons
舞呢堆嘢都攪咗我差唔多一日...

諗番起,以前有個阿 sir 成日話古典音樂先"高尚",其他就"廢",我就唔係太認同啦!
音樂就係音樂,你鐘意飲法國紅酒,我都可以黎枝國產竹葉青呀...
呢啲嘢,只係相對唧!

不過咁,我都好鐘意古典音樂嘅。
講番轉頭,我唔識玩樂器,對音樂嘅認識,就只係去到五級樂理。
本來都想繼續考落去,但係發覺唔識樂器嘅話,又只會事倍功半,故此作罷。

果時我嘅報讀係一B字頭大學嘅校外課程,Miss A 係一個好出色嘅說書人,上堂嘅時間係一段好快樂嘅時光。
不過本textbook AB guide 就幾難讀...
對初學者黎講,讀深入淺出嘅 First Steps in Music Theory 會更好!

2008年2月16日星期六

我的格子生活

我平日寫嘢呢,查實好多時都喺度打啞謎,我諗無人知我講啲乜...
固此呢,我要變!慢慢會寫番其他嘢,分享多啲開心事囉!

送給你、我、他、她、它

2008年2月14日星期四

有緣再會

正是有人辭官歸故里,有人漏夜趕科場。
正當喵啱啱番黎嘅時候,兵姐又話要離開...

唉... 我都好鐘意睇兵姐寫嘅嘢,尤其係夕陽西下...
(長相思中的花含煙呢?少睇啲啲)
雖然好多時都睇到心中慼慼...但係又繼續睇踻。

不過咁,人生就係要面對唔同嘅決擇及挑戰,我謹在此向兵姐祝福,希望妳一帆風順!

可能有朝一日,大家會喺網上再遇之餘,更喺現實世界相見呢!

2008年2月10日星期日

新年新氣象

正如很多人一樣,每年年頭我都會在心中許願,為來年定下一些目標。
卻是年光似鳥翩翩過,世事如棋局局新...
身邊的事情往往變化萬千,很多時都在你我意料之外。
當命運巨輪轉動時,我只希望每次都做好最佳的準備,抱有最壞的打算。
其他的,隨緣吧...

未知明年今日,我又會抱住什麼心情,在此寫朴呢?

2008年2月7日星期四

鼠年快樂

大年初一...
祝各位鼠年快樂,身體健康,心想事成!

2008年2月4日星期一

自爆 X 交差朴

因為一時大意,暴露身份...

其實我都「哎吔」地參加了聖誕交差朴...
不過我寫嘅係邊篇就唔講啦,知道嘅話,大家心照啦...

在此說一句:
佳偶天成,千里姻緣一線牽!